ہر زماں یا رب خیال چشم مستانہ رہے

ہر زماں یا رب خیال چشم مستانہ رہے

بادۂ وحدت رہے اور ذکر جانانہ رہے

قلقل مینا رہے اور دور پیمانہ رہے

دل ربا ساقی رہے اور شور مستانہ رہے

تیرے قرباں ساقیا بھر بھر کے دے جام طہور

تو سلامت ہو ترا آباد مے خانہ رہے

تو رہے آنکھوں میں میری تجھ کو میں سجدہ کروں

کعبہ آنکھوں میں مری ٹھہرے نہ بت خانہ رہے

دیکھ کر صحرا میں مجھ کو وہ یہ دیتے ہیں دعا

قیس کا یا رب مرے آباد ویرانہ رہے

مجھ کو یوں مجنوں بنایا ہے خیال یار نے

کہ جنوں بھی دنگ ہو مجنوں بھی دیوانہ رہے

دست ساقی کے تصدق جام کچھ ایسا دیا

ہم رہے غوثیؔ جہاں بھی پیر مے خانہ رہے