وہ ابروئے خم دار بدلی ہوئی ہے

وہ ابروئے خم دار بدلی ہوئی ہے

دلوں کی طلب گار بدلی ہوئی ہے

قدم کو ملا کر چلو ساتھ اس کے

زمانے کی رفتار بدلی ہوئی ہے

اسیروں کے انداز ناگفتنی ہیں

سلاسل کی جھنکار بدلی ہوئی ہے

بساط مے و جام الٹی پڑی ہے

غضب چشم مے خوار بدلی ہوئی ہے

ہوئے سوختہ دل کے خرمن کے خرمن

نگاہ شرر بار بدل ہوئی ہے

متاع دل و جاں کا ہو کون ضامن

نگاہ نگہ دار بدلی ہوئی ہے

غبارؔ اب کہاں دین و ایماں سلامت

کہ ہر وضع دیں دار بدلی ہوئی ہے