میں کیا بتاؤں چمن میں نظر کہاں پہ رہی

میں کیا بتاؤں چمن میں نظر کہاں پہ رہی

کبھی گلوں پہ کبھی روے باغباں پہ رہی

بہار میں تو نظر کو سکوں نصیب نہ تھا

کبھی تو برق کبھی شاخ آشیاں پہ رہی

تری تلاش میں جان نگاہ آوارہ

کہاں کہاں پہ گئی اور کہاں کہاں پہ رہی

نہ جانے کون سی اس کی ادا پسند آئی

نگاہ برق جو ہر وقت آشیاں پہ رہی

نہ روئے شیخ حرم کو کبھی نصیب ہوئی

جو روشنی کی جھلک چہرۂ بتاں پہ رہی

اثر سے جس کے معاً جل بجھے تھے پروانے

وہ بات تا بہ سحر شمع کی زباں پہ رہی