ناتواں ہیں اب کہاں چلنے کی طاقت آہ ہے

ناتواں ہیں اب کہاں چلنے کی طاقت آہ ہے

دو قدم کی راہ ہم کو سو برس کی راہ ہے

بیٹھ کر بسمل کی آنکھوں میں تماشا اس کا دیکھ

یہ گلستان جہاں طرفۂ شہادت گاہ ہے

تیرا اے دامان وصل یار اس میں کیا قصور

ہاتھ بخت نارسا کا اپنے ہی کوتاہ ہے

چھوڑ دی کیا جلد طاقت نے رفاقت میری آہ

ضعف سے خوش ہوں کہ مرتے تک مرے ہم راہ ہے

ہوش والے محرم راز اس کے اے راسخؔ نہیں

کہتے ہیں جو بے خبر ہے کچھ وہی آگاہ ہے