گو اہل وفا سے وہ ستم گر نہیں ملتا

گو اہل وفا سے وہ ستم گر نہیں ملتا

یہ شکر ہے غیروں سے بھی اکثر نہیں ملتا

یہ خم نہیں ملتا ہے یہ جوہر نہیں ملتا

ابرو سے تمہارے کوئی خنجر نہیں ملتا

اب بار ہے سر دوش پر اے شوق شہادت

لللہ بتا دے وہ ستمگر نہیں ملتا

دل کیا ہے جو اس زلف سے جا کر پلٹ آئے

انسان اسی کوچہ میں کھو کر نہیں ملتا

جب تک نہ ملے وہ تو کوئی کیا اسے پائے

حیرت کی تو یہ بات ہے مل کر نہیں ملتا

کیا کہتے ہیں ممکن نہیں اللہ کا ملنا

تم ڈھونڈ کے دیکھو بھی تو کیوں کر نہیں ملتا

ہاتھ آئے گا کس طرح سے وہ گوہر یکتا

دریائے محبت کا شناور نہیں ملتا

ملتے ہیں کہیں کھوئے ہوئے راہ طلب کے

ہم ڈھونڈ رہے ہیں ہمیں اکبرؔ نہیں ملتا