دعائیں مانگی ہیں مدتوں تک جھکا کے سر ہاتھ اٹھا اٹھا کر

دعائیں مانگی ہیں مدتوں تک جھکا کے سر ہاتھ اٹھا اٹھا کر

ہوا ہوں تب میں بتوں کا بندہ خدا خدا کر خدا خدا کر

دکھایا وحدت نے اپنا جلوہ دوئی کا پردہ اٹھا اٹھا کر

کروں میں سجدہ بتوں کے آگے تو اے برہمن خدا خدا کر

کبھی مرے دل سے کرتی ہیں بل کبھی یہ شانے سے ہیں الجھتی

غرض کہ زلفوں کو تو نے ظالم بگاڑا ہے سر چڑھا چڑھا کر

گناہ کرتا ہے برملا تو کسی سے کرتا نہیں حیا تو

خدا کو کیا منہ دکھائے گا تو ذرا تو اے بے حیا حیا کر

کیا ہے پوشیدہ عشق ہم نے کسی سے در پردہ ہے محبت

پڑے ہوئے بستر الم پر جو روتے ہیں منہ چھپا چھپا کر

ترا سا قد بن سکا نہ ہرگز تری سی صورت نہ بن سکی پھر

اگرچہ صانع نے لاکھوں نقشے بگاڑ ڈالے بنا بنا کر

گئی ہے گویا شبِ جوانی اب آن پہنچی ہے صبح پیری

بہت سی کی تو نے بت پرستی بس اب تو دو دن خدا خدا کر