تمنا ہے کہ دیکھوں آنکھ سے وہ شکل نورانی

تمنا ہے کہ دیکھوں آنکھ سے وہ شکل نورانی

نظر جس شکل نورانی میں آئے شکل یزدانی

پتہ اس کا نہ تھا روح الامیں سے بھی فرشتہ کو

جو کچھ تھا واسطہ اللہ سے حضرت کا روحانی

خدا کی شان تو شان محمد میں نظر آئی

مگر شان محمدؐ دیکھی دنیا بھر میں لا ثانی

تجلی گاہ ہے عرش معلیٰ اس شہہ دیں کا

نظر میں کیا ہو اس کے وقعت تخت سلیمانی

ترا دربار دربار الٰہی کا نمونہ ہے

گداؤں کو ترے دربار سے ملتی ہے سلطانی

عجب کیا ہے شریک عرس ہوں جن و ملک آ کر

کہ ہے عرس و مبارک خواجۂ شاہ سلیمانی

اٹھایا جاؤں مداحوں میں حضرت کے قیامت میں

کیا کرتا ہوں اس امید پر حافظؔ غزل خوانی