اہمیت رکھتے نہیں ہیں گلشن و ویرانہ اب

اہمیت رکھتے نہیں ہیں گلشن و ویرانہ اب

رات دن رہتا ہے دل میں یار کا کاشانہ اب

ہیں تو سمجھا ہی رہے ہیں دل سمجھتا ہی نہیں

آپ سے شاید سمجھ جائے ذرا سمجھانا اب

غیر کے ہاتھوں سے پینے میں مزہ آتا نہیں

ہے مزہ جب خود پلائے ساقئ مے خانہ اب

کون سی مے آپ نے اس کو پلائی ہے میاں

ہوش میں آنے لگا ہے آپ کا دیوانہ اب

یار کے قدموں میں عالم تو لٹا دے زندگی

اس سے اچھا ہو نہیں سکتا کوئی نذرانہ اب