راحت طلب و طالب آزار ہمیں ہیں

راحت طلب و طالب آزار ہمیں ہیں

معشوق ازل عاشق دل دار ہمیں ہیں

لیلیٰ کے گرفتار ہیں لیلیٰ بھی ہمیں ہیں

ہم مجنوں ہیں رسوا سر بازار ہمیں ہیں

پیتے ہیں مے ساغر توحید دمادم

مومن ہیں ہمیں کافر عیار ہمیں ہیں

ہم شاہد و مشہود ہیں ہم عاشق و معشوق

خواجہ ہیں ہمیں شبلی و عطار ہمیں ہیں

ہم نور ہیں ہم طور ہیں ہم جلوۂ حق ہیں

موسیٰ کی طرح طالب دیدار ہمیں ہیں

ہم آپ ہی منصور ہیں اور آپ انا الحق

ہم شرع کو سر دیتے ہیں سردار ہمیں ہیں

مولیٰ ہیں غریبوں کے شہنشاہ نجف ہیں

سلطان عرب حافظؔ و مختار ہمیں ہیں