جب سے دیکھی ہے مری جاں ہم نے صورت آپ کی

جب سے دیکھی ہے مری جاں ہم نے صورت آپ کی

ہو گئی ہے جاگزیں دل میں محبت آپ کی

اک دم میں کر لیا قبضہ دل عشاق پر

ہے عجب چلتا ہوا جادو محبت آپ کی

ہے بہت دلچسپی میرے دل سے تیری ذات کو

گھر بنا بیٹھی ہے میرے دل میں صورت آپ کی

اشک جب جاری ہوئے آنکھوں سے دریا بہہ گئے

جوش زن ہے یہ میرے دل میں محبت آپ کی

مست کر دیتا ہے دل کو نام نامی آپ کا

یا علی میں کیا کہوں کیا ہے محبت آپ کی

آپ کی دوری میں میری جان جائے گی ضرور

ہے قضا میرے لئے اے جان فرقت آپ کی

اس صفائے رخ نے آئینہ بنایا ہے مجھے

میری صورت میں نظر آتی ہے صورت آپ کی