ہم شوخیٔ انداز جفا دیکھ رہے ہیں

ہم شوخیٔ انداز جفا دیکھ رہے ہیں

ہاتھوں میں قیامت کی حنا دیکھ رہے ہیں

دل دیکھ رہے ہیں کہ خدا دیکھ رہے ہیں

ہم حسن میں کیا جانئے کیا دیکھ رہے ہیں

پردے میں انہیں پردہ کشا دیکھ رہے ہیں

پھر شوق بانداز حیا دیکھ رہے ہیں

ہم اور کوئی مست خرابات جوانی

توبہ ہے کہ ایمان گیا دیکھ رہے ہیں

ہر رنگ میں ہم ڈھونڈ رہے ہیں کوئی منزل

ہر راہ میں نقش کف پا دیکھ رہے ہیں

خلوت میں نشورؔ آپ کو تسبیح مبارک

ہم باغ میں ہیں اور گھٹا دیکھ رہے ہیں