ہم اس بزم میں مہماں جا رہے ہیں

ہم اس بزم میں مہماں جا رہے ہیں

بلایا ہے کس نے کہاں جا رہے ہیں

اٹھے ہیں جو خوش خوش کوئی ان سے پوچھے

وہ دفنا کے ہم کو کہاں جا رہے ہیں

مرے بعد اتنا خیال ان کو آیا

مٹانے لحد کا نشاں جا رہے ہیں

عدم کو جانے والے عدم کو سدھارے

کسی سے نہ پوچھا کہاں جا ہے ہیں

خدا ہی پہنچائے ان کو تو پہنچیں

عدم کو تیرے ناتواں جا رہے ہیں

مجھے در سے اٹھوا کے کہتے ہیں ہنس کر

کوئی ان سے پوچھے کہاں جا رہے ہیں

بڑے لطف سے ہم چلے ہیں قفس کو

لیے دوش پر آشیاں جا رہے ہیں

کسی نے نہ اے موت ہم کو بتایا

کہاں سے ہم آئے کہاں جا رہے ہیں

خجل ہوں گے مے خانے میں شیخ صاحب

مرے ساتھ حضرت کہاں جا رہے ہیں