ہمیں آیا اگر کچھ ذوق اپنی خود نمائی کا

ہمیں آیا اگر کچھ ذوق اپنی خود نمائی کا

پکار اٹھے گا خود ہی ناز اس کی کبریائی کا

مزہ میں دم بھرا وارث کی سچی آشنائی کا

یہ کیا معلوم تھا ہم کو کہ غم ہوگا جدائی کا

خدا سمجھے تجھے ناصح ملامت پر ملامت کی

کیا آخر کو تو نے فاش پردہ پارسائی کا

تمہاری چشم پر فتنہ کے یہ سارے کرشمہ ہیں

چرا لائے کسی کا دل مرض ہے دل ربائی کا

فلک خود پیر ہے گردش ستائے آپ ہی اس کو

اسی سے آہ کو شکوہ ہے اپنی نارسائی کا

دکھا دو جلوۂ وارث کہ ہم مشتاق مرتے ہیں

اگر کچھ بھی تمہیں دعویٰ ہے اپنی خود نمائی کا

کیا کرتے ہیں کافر اور مومن وارثی سجدہ

فداؔ کس آنکھ سے دیکھیں تماشہ ہے خدائی کا