دل کو منظور محبت کا جو اظہار ہوا اور بیمار ہوا

دل کو منظور محبت کا جو اظہار ہوا اور بیمار ہوا

حضرتِ عشق سے بس اس کو سروکار ہوا، سب سے بیزار ہوا

کہہ کے منصور انا الحق جو خطا وار ہوا، بر سرِ دار ہو

اہل عالم میں نہاں عشق نہ زنہار ہوا، ضبط دشوار ہوا

آپ ہی حضرتِ موسیٰ نہیں غش کھا کے گرے، کب ملک ہوش میں تھے

دیکھ کر طور بھی محوِ رخِ دلدار ہوا، عاشقِ زار ہوا

دام گیسو میں پھنسا جا کے مرا طائرِ دل ہے رہائی مشکل

کس مصیبت میں یہ کم بخت گرفتار ہوا، چھٹنا دشوار ہوا

لی مع اللہ میں من و تو کا بھلا ذکر کہاں، جس سے ہو کوئی گماں

احد احمد ہوا احمد صفتِ یار ہوا، خوب اظہار ہوا

آج کل دیکھتے ہیں پھر جو اداس آپ کو ہم، کچھ تو ہے رنج و الم

کہیے اے حضرتِ دل کس کا نیا وار ہوا، جینا دشوار ہوا

اس پہ تو جان سے ہیں جن و بشر سب قربان، ہیں ملک بھی حیراں

سارا عالم مرے یوسف کا خریدار ہوا، عاشقِ زار ہوا

جلوۂ حق کی تمنا تجھے کیوں ہے اے دل، ہے یہ کارِ مشکل

تو بھی موسیٰ کی طرح طالبِ دیدار ہوا، غم سے دوچار ہوا

کیا کہوں کیوں ہے پریشانی و غم سے مضطر، حامدِؔ خستہ جگر

عشقِ جاناں میں یہ حالِ دلِ بیمار ہوا، جینا دشوار ہوا