ہم اس کوچے کو جذب شوق کی منزل سمجھتے ہیں

ہم اس کوچے کو جذب شوق کی منزل سمجھتے ہیں

در جاناں کے ہر ذرہ کو اپنا دل سمجھتے ہیں

ابھرنا ڈوبنے کو عشق میں اے دل سمجھتے ہیں

یہ وہ دریا ہے جس کی تہ کو ہم ساحل سمجھتے ہیں

تڑپتی خاک پر جوش جہاں دکھلائی دیتی ہے

ہم اس کو ذوق بیتابی میں اپنا دل سمجھتے ہیں

سفر دشوار ہے ملک عدم کا ناتوانی سے

ترے بیمار ہر کروٹ کو اک منزل سمجھتے ہیں

حباب آسا جنہیں بحر فنا سے پار اترنا ہے

بھنور کو اپنی کشتی موج کو ساحل سمجھتےہیں

صدائے درد وغم ان کے لئے ہے نغمہ عشرت

وہ نالوں کو ہمارے رونق محفل سمجھتے ہیں

لحد سے اٹھ کے پہنچیں گے تماشا دیکھنےوالے

جو میدان قیامت کو تری محفل سمجھتے ہیں

جو مرکر پار اترنے والے ہیں دریائے ہستی سے

جنازہ کو وہ کشتی قبر کو ساحل سمجھتے ہیں

لیے ہیں سر وہ زانو پر ہمارا دم نکلتا ہے

ہم اس کو زندگی بھر کا شفق حاصل سمجھتے ہیں