اٹکی ہوئی ہے کوئی نظر آسمان پر

اٹکی ہوئی ہے کوئی نظر آسمان پر

اے شب ذرا سی دیر ٹھہر آسمان پر

جی چاہتا تھا دیکھ لوں تیری زمین بھی

ورنہ تو عالی شان تھا گھر آسمان پر

ہم نے تخیلات سے اپنے لیا یہ کام

ہم نے بنائی راہ گزر آسمان پر

حبل الورید کہہ کے پتا جس نے دے دیا

ڈھونڈو گے اور اس کو کدھر آسمان پر

اہل زمیں کی آنکھ سے کیسے چھپے گا وہ

دکھلائے گا جو اپنا ہنر آسمان پر

تخلیق آدمی سے لے کے آج تک جمالؔ

پھیلا ہے اک عجیب ہی ڈر آسمان پر