وہ کیوں بگڑے مرے شور فغاں سے

وہ کیوں بگڑے مرے شور فغاں سے

شکایت ان سے تھی یا آسماں سے

ہمیں ان کا خیال اللہ اکبر

کہاں تک تھا کہاں تک ہے کہاں سے

کہاں تک پا گئی عشق نظر کو

شکایت ہو نہ حسن بدگماں سے

ملامت ہی لکھی ہے سربسر کیا

مری قسمت میں تیرے پاسباں سے

گھری کس کشمکش میں ہے تمنا

دل بیتاب و جسم ناتواں سے

کہیں ان کے تصور کی بلندی

گزر جائے نہ حد لا مکاں سے

کسی پر مٹ کے رہ جانا ہے حسرتؔ

ہمیں کیا کام عمر جاوداں سے