روز و شب رویا کئے شام و سحر رویا کئے

روز و شب رویا کئے شام و سحر رویا کئے

رونے والے تیرے تجھ کو عمر بھر رویا کئے

ہے وفائی سب سے کر کے تو نے دی داد وفا

تیری اس ہمت پہ تیرے نوحہ گر رویا کئے

خامکاری میں بھی تیری وضع داری کا تھا رنگ

یعنی ہم اس سے بھی کر کے درگزر رویا کئے

کچھ خبر ہے تجھ کو اے آسودۂ خواب لحد

شب جو تیری یاد میں ہم تا سحر رویا کئے

تیرے جیتے جی نہ جانی قدر تیری اے عزیز

اپنی اس تقصیر پر ہم کس قدر رویا کئے

جان مخزوں و دل پر غم کی حالت کیا کہوں

یاد کچھ کر کر کے جو باہم دگر رویا کئے

برقؔ کے مرنے کا حسرتؔ واقعہ ایسا نہیں

کچھ نہ روئے آہ اگر ہم عمر بھر رویا کئے