ہوا موافق نہیں باغ جناں کی

ہوا موافق نہیں باغ جناں کی

خبر لا دے کوئی کوئے بتاں کی

سحر سے دل نہیں ٹھہرا ہے میرا

ہوا آئی تھی کیا کہئے کہاں کی

قیامت آ گئی اے بیکسی کیا

سفر میں یاد اور کوئے بتاں کی

وہ دزدیدہ نظر وہ مہر مخفی

ستم ہے یاد عشق ناگہاں کی

وہ روئیں وقت رخصت اب ہمیں کیا

رسائی ہائے آہ ناتواں کی

ترے کوچے کی ہو جائے تو اچھا

خدا جانے یہ مٹی ہے کہاں کی

نہ پوچھیں آپ حال مرگ میکشؔ

عجب حالت ہوئی اس نوجواں کی