حجاب کس کا ہے آخر دلہن بنائے ہوئے

حجاب کس کا ہے آخر دلہن بنائے ہوئے

ہے بو جو غنچوں کی گھونگھٹ میں منہ چھپائے ہوئے

کرو نہ جوہر ذاتی کو عرشؔ ظاہر تم

زمیں اپنے خزانوں کو ہے چھپائے ہوئے

وہ لوگ منزل پیری میں ہیں جو آئے ہوئے

خیال قبر میں بیٹھے ہیں سر جھکائے ہوئے

جناب عرشؔ کو کس مست ناز کا ہے خیال

کہ آج جھوم رہے ہیں وہ سر جھکائے ہوئے

فراق میں ہیں ہم انداز دل کا پائے ہوئے

یہ وہ چراغ ہے جلتا ہے بے جلائے ہوئے

اگر ہو سوز تو اے عرش دل کو روشن کر

چراغ جل نہیں سکتا ہے بے جلائے ہوئے