ادھر بھی اک نظر او شاہزادے

ادھر بھی اک نظر او شاہزادے

تجھے اللہ دونا چوگنا دے

مرے کھوئے ہوئے دل کا پتا دے

تو مٹھی کھول دے زلفیں ہلا دے

ترے گالوں سے پھر یہ رنگ لایا

طمانچہ پھول کے منہ پر لگا دے

مزا آئے اگر واعظ کے منہ میں

کوئی مے خوار تھوڑی سی چوا دے

یہ بڑھ کر دخت رز زاہد سے بولی

جو توبہ توڑ دوں تیری تو کیا دے

وہ کمسن شوخ ہے یا رب مجھے بھی

طبیعت شوخ دے دل چلبلا دے

مزے آئے یہ بوسوں کے شب وصل

کہا اس نے کہ لے میں نے کہا دے

بتوں کے ظلم کا شکوہ ہے بے سود

کہ ان کی ایک چپ سو کو ہرا دے

کہاں تھا رات کس کے پاس تھا رات

ذرا اکبرؔ سے آنکھیں تو ملا دے