عید کا چاند ہے تو عید مبارک ہو تجھے

عید کا چاند ہے تو عید مبارک ہو تجھے

مجھ دعا گو سے یہ کہہ دید مبارک ہو تجھے

نذر لایا ہوں یہ دل اٹھ کے بغل گیر ہو مل

عید میں دید کی فہمید مبارک ہو تجھے

واہ کیا ساز طرب سے ہے تری محفل گرم

عیش و عشرت کی یہ تمہید مبارک ہو تجھے

محتسب میں تو ہوں اک نرگس مخمور کا مست

کر تو مے خواروں پہ تحدید مبارک ہو تجھے

زاہدا راہ حقیقت سے نہیں تجھ کو علم

عمل خیر بہ تقلید مبارک ہو تجھے

کہو منصور سے حق کہہ کے تو سولی پہ چڑھا

ثمرۂ شجرۂ توحید مبارک ہو تجھے

تو تو آزاد قلندر ہے مشائخ میں ترابؔ

شان تجرید و تفردی مبارک ہو تجھے