وصل کی خواہش وفا کا حوصلہ جاتا رہا

وصل کی خواہش وفا کا حوصلہ جاتا رہا

دل لگانے کا مزا او بے وفا جاتا رہا

اب ستم پر بھی نہیں مائل طبیعت یار کی

دوستی کیا دشمنی کا بھی مزا جاتا رہا

بیخودی کا ہو برا یہ بھی خبر ہم کو نہیں

دل گیا یا جاں گئی، کیا جانے کیا جاتا رہا

رنج کا یا رشک کا باقی نہیں اب دل میں نام

تم گلے سے آملے سارا گِلا جاتا رہا

اے اثر ؔدل کے چلے جانے کا کیا اتنا ملال

ایک دن جانا ہی تھا جاتا رہا جاتا رہا