عشق کی کائنات میں عمر تمام ہو گئی

عشق کی کائنات میں عمر تمام ہو گئی

جاگنا فرض ہو گیا نیند حرام ہو گئی

ڈوب رہا تھا آفتاب دور تھی منزل مراد

اب وہ غریب کیا کرے راہ میں شام ہو گئی

ہر ہر قدم میں یاس و غم کانٹے بچھے ہیں ہر قدم

زندگی ایسی راہ میں محو خرام ہو گئی

عشق تھا اپنے زعم میں عشق کو ضد بنی رہی

قصہ ہوا نہ مختصر عمر تمام ہو گئی

لاکھ چھپایا راز دل لیکن رشیدؔ کیا کریں

اہل نظر سمجھ گئے بات یہ عام ہو گئی