عشق میں آ عجب مزا دیکھا

عشق میں آ عجب مزا دیکھا

خویش و بیگانہ آشنا دیکھا

نکتۂ ایمان سے واقف ہو

چہرۂ یار جا بجا دیکھا

بلکہ یہ بولنا تکلف ہے

ہم نے اس کو سنا ہے یا دیکھا

دیکھتا آپ ہے سنے ہے آپ

نہ کوئی اس کے ماسوا دیکھا

صورت گل میں کھلکھلا کے ہنسا

شکل بلبل میں چہچہا دیکھا

شمع ہو کر کے اور پروانہ

آپ کو آپ میں جلا دیکھا

کر کے دعویٰ کہیں انا الحق کا

بر سر دار وہ کھنچا دیکھا

تھا وہ برتر شما‌ و ما سے نیازؔ

پھر وہی اب شما‌ و ما دیکھا