جب موسم گل آن کے تائید کرے ہے

جب موسم گل آن کے تائید کرے ہے

تب جوش جنوں عقل کی تردید کرے ہے

اٹھے گا یہاں پھر نہ کبھی شور تمنا

دل بیچ یہی یاس اب امید کرے ہے

جو بیچ محبت کے فنا ہووے ہے اے دل

حاصل وہی تو ہستیٔ جاوید کرے ہے

جس روز کہ پہنچے ہے نئی کوئی مصیبت

اس روز تیرا خوگر غم عید کرے ہے

رکھے ہے جبیں در پہ تیرے گنبد گرداں

سجدہ ترے دروازے پر خورشید کرے ہے

سجادؔ جو سمجھا ہے خود اپنے تئیں موجود

وہ فہم نہیں معنیٔ توحید کرے ہے