جب مرا ذوقِ نظر حسن آزما ہو جائے گا

جب مرا ذوق نظر حسن آزما ہو جائے گا

لاکھوں پردوں سے بھی وہ جلوہ نما ہو جائے گا

یہ نکما پن جمود دل کا اک انجام ہے

دل سے کوئی کام لے دل کام کا ہو جائے گا

برہمن اور شیخ میں ہے مدتوں سے گفتگو

تم کہیں جلوہ دکھا دو فیصلہ ہو جائے گا

صفحۂ تاریخ پر کام آئے گا میرا لہو

کم سے کم رنگین عنوان وفا ہو جائے گا

مصلحت یہ ہے خودی کی غفلتیں طاری رہیں

جب خودی مٹ جائے گی بندہ خدا ہو جائے گا

طالب کل ہو کے فوت الکل کی محرومی نہ لے

ایک کا ہو جا تو پھر سب کچھ ترا ہو جائے گا

زندگی دو دن کی ہے لمبی سہی میعاد قید

آج آیا ہے قفس میں کل رہا ہو جائے گا

سو کے اٹھنا بھی ہے اے سیمابؔ دنیا میں محال

مر کے جی اٹھنا مرا اک معجزہ ہو جائے گا