آنکھوں میں رنگ و نور کا منظر سمیٹ لو

آنکھوں میں رنگ و نور کا منظر سمیٹ لو

جو دل کو دے سکون وہ پیکر سمیٹ لو

قطروں سے بجھ نہ پائے گی برسوں کی پیاس یہ

اے تشنہ کام آؤ سمندر سمیٹ لو

پتھر دلوں کو نرم نہ کر پاؤ گے کبھی

اشکوں کو اپنی آنکھوں کے اندر سمیٹ لو

آگے ہے رہزنوں کا ٹھکانہ یہ جان لو

اب قافلہ کو اے مرے رہبر سمیٹ لو

شیشے کے شہر میں یوں رہتے ہو تو رہو

لیکن جہاں بھی دیکھ لو پتھر سمیٹ لو

بڑھتے وہ آ رہے ہیں اندھیروں کے قافلہ

تم اے اجالوں اپنا یہ دفتر سمیٹ لو

مسجد میں ہونے والی ہے جوہر اذان صبح

اب تو خدا کے واسطے بستر سمیٹ لو