جدھر دیکھتا ہوں جہاں دیکھتا ہوں

جدھر دیکھتا ہوں جہاں دیکھتا ہوں

خدا ہی کا جلوہ عیاں دیکھتا ہوں

نہ تن دیکھتا ہوں نہ جاں دیکھتا ہوں

تجھی کو عیاں اور نہاں دیکھتا ہوں

اگر کوئی جانے جہاں غیر حق ہے

سو میں اس کو دھوکا گماں دیکھتا ہوں

یہ جو کچھ کہ پیدا ہے سب عین حق ہے

کہ اک بحر ہستی رواں دیکھتا ہوں

جسے ذات بے رنگ و بے چوں کہیں ہم

بہر رنگ جلوہ کناں دیکھتا ہوں

نیازؔ اب ہوا ناتوانی سے تو پیر

ولے عشق تیرا جواں دیکھتا ہوں