جگر میں درد بھی ہے اور دل نڈھال بھی ہے

جگر میں درد بھی ہے اور دل نڈھال بھی ہے

بتائے حالت دل کون مجھ میں حال بھی ہے

یہ دل ہے وہی جو تم لے اڑے تھے چل کر چال

ستم یہ ہے کہ وہی آج پائمال بھی ہے

قیامت آئی تو یہ تیری چال دیکھنے کو

اسے خبر نہیں یہ دم میں پائمال بھی ہے

خراب ہو کے بنا قیس دشت وحشت میں

زوال بھی ہے اسی عشق میں کمال بھی ہے

ہم اس میں راضی ہیں تم عاشقوں کو قتل کرو

مگر خیال رہے آدمی کا کال بھی ہے

مرے ہوئے ہو بتوں پر جو دل سے تم اکبرؔ

خدا کو منہ بھی دکھانا ہے کچھ خیال بھی ہے