جس یار کی ہو یاد میں گھر بار فراموش

جس یار کی ہو یاد میں گھر بار فراموش

ہوتا ہے کوئی دل سے وہ دل دار فراموش

جو مست ہیں تجھ درس کے اے ساقیٔ سرشار

ہو کیوں نہ انہیں خانۂ خمار فراموش

گر بادۂ توحید پئیں اہل مشارب

ہفتاد و دو ملت کی ہو تکرار فراموش

پردے کو ٹک اک منہ سے اگر یار اٹھا دے

ہو جاویں ز خود مردم ہشیار فراموش

یہ چہرۂ زیبا جو برہمن کبھی دیکھے

ہو جائے اسے بت کی پرستار فراموش

گر کبک دری چال تری بانکی یہ دیکھے

کرے جائے اچک اور کرے رفتار فراموش

جب دل میں کھینچا نیازؔ کے تجھ حسن کا نقشہ

ہو کیوں نہ اسے صورت اغیار فراموش