جیے یہاں کے لیے یا مرے وہاں کے لیے

جیے یہاں کے لیے یا مرے وہاں کے لیے

اکیلا دم کرے کیا کیا کہاں کہاں کے لیے

سبب نہ پوچھ کہ یہ ابتدا کی باتیں ہیں

فغاں ہی اب تو سبب ہے مری فغاں کے لیے

نہ راز حسن کی تفصیل پوچھ اے ہمدم

خلاصہ یہ کہ آفت ہے رازداں کے لیے

عصائے آہ لیا جامۂ فنا پہنا

بتا دے دل ہیں یہ تیاریاں کہاں کے لیے

نہ بیٹھ مطمئن اے دل کہ ہے یہ نادانی

وہ امتحاں سے گریزاں ہیں امتحاں کے لیے

اٹھیں گے حشر میں کہتے ہوئے کہ ہائے غضب

رہے گا خوب یہ عنوان داستاں کے لیے

نہ سمجھو بڑ اسے مجذوبؔ کی بغور سنو

یہ ایک گنج معانی ہے نکتہ داں کے لیے