جو کی تیری تمنا تو تمنا تھی مجھے غم کی

جو کی تیری تمنا تو تمنا تھی مجھے غم کی

تمنا سے مگر سازش تری نظروں نے کیا کم کی

نہیں موقوف کچھ ملنے نہ ملنے پر ترے ظالم

مرے دل سے نہ جائے گا یہ فطرت ہے ترے غم کی

تقاضا درد دل کا ہے کہ لے کر مجھ کو اڑ جائے

جسے کہتے ہیں نالہ کوشش ناکام ہے رم کی

تمہیں جب دیکھتا ہوں چاہتا ہے جی کہ مٹ جاؤں

خدا جانے یہ کیفیت مسرت کی ہے یا غم کی

خلش خار تمنا کی ہے وجہ زندگی مجھ کو

وفا کا کیا کروں شکوہ جفا بھی آپ نے کم کی

نہ چھیڑو ساز عشرت اور تھوڑی دیر دم لے لو

نہ کر دے پست نغموں کو صدا میکشؔ کے ماتم کی