نہیں معلوم وہ کب لے گیا دل

نہیں معلوم وہ کب لے گیا دل

ابھی میری بغل میں تھا مرا دل

بھرے تھے گل ہی جس دامن میں گل چیں

سو اب لختِ جگر ہے اس میں یا دل

ابھی کر بیٹھتے ہم ترکِ دنیا

جو دولت پر ہمارا دوڑتا دل

پریشاں رات دن رہتا ہے شاید

کسی کی زلف کا ہے مبتلا دل

چمن میں دیکھتے اس گل بدن کو

شگفتہ مثلِ غنچہ ہوگیا دل

نصیبوں کی کہاں تک کہیے خوبی

جو اس کے پاس جوششؔ لے گیا دل

تو وہ منہ پھیر کر جھنجھلا کے بولا

اٹھا بھی تحفگی رکھتا ہے کیا دل