ہمیں جس روز سے در کی ترے دربانی ہے

ہمیں جس روز سے در کی ترے دربانی ہے

ہاتھ سے اپنے رقیبوں کا جگر پانی ہے

قاصد اب گوش بگوش اس سے ذرا اتنا کہ

کام آنکھوں کا مرے بھی گہر افشانی ہے

باریابی تجھے ناصح میرے در تک مشکل

آستانہ پر مرے عشق کی دربانی ہے

کیوں سامان رہائی کا ہے دل کے ظالم

حلقۂ زلف میں جب دل کی نگہبانی ہے

ناصحا وعظ کو تہ کیجییے تقصیر معاف

ہاتھ سے دل کے یہاں آب جگر پانی ہے

ناصحا راست کہا بات ہے یہ لاکھ کی ایک

دل دیا ہاتھ میں اس کی یہی نادانی ہے