کبھی یہ بستی کبھی یہ صحرا گھڑی میں کچھ ہے گھڑی میں کچھ ہے

کبھی یہ بستی کبھی یہ صحرا گھڑی میں کچھ ہے گھڑی میں کچھ ہے

عجیب حالت ہے دل کا نقشہ گھڑی میں کچھ ہے گھڑی میں کچھ ہے

وہ رشک گل کل یہاں تھا مہماں یہ گھر تھا خلوت کسی دلہن کی

ہمارے اجڑے مکاں کا نقشہ گھڑی میں کچھ ہے گھڑی میں کچھ ہے

منٹ منٹ میں بدل رہا ہے یہ رنگ حربا کی طرح اپنا

نہیں ہے اک حال پر زمانہ گھڑی میں کچھ ہے گھڑی میں کچھ ہے

ابھی تھیں میرے گلے میں بانہیں ابھی ہے غیروں سے گرم صحبت

مزاج اس طفل مہ لقا کا گھڑی میں کچھ ہے گھڑی میں کچھ ہے

اسے بنایا اسے بگاڑا اسے بگاڑا اسے بنایا

یہی ہے دنیا کا کارخانا گھڑی میں کچھ ہے گھڑی میں کچھ ہے

ابھی تھی دارا کی بادشاہی ابھی سکندر کی ہے حکومت

عجیب عبرت کی جا ہے دنیا گھڑی میں کچھ ہے گھڑی میں کچھ ہے

ابھی وہ اکبرؔ کے سامنے تھا ابھی نظر سے ہوا چھلاوا

کبھی ہے پنہاں کبھی ہے پیدا گھڑی میں کچھ ہے گھڑی میں کچھ ہے