کہو دیر و حرم یا نام اپنا آستاں رکھ دو

کہو دیر و حرم یا نام اپنا آستاں رکھ دو

سر تسلیم خم ہے تم جہاں چاہو وہاں رکھ دو

تسلی دینے والو ہم تہی دستان قسمت ہیں

سر دامن جو ممکن ہو تو دل کی دھجیاں رکھ دو

خدا کہلاؤ یا کچھ اور سب کچھ مجھ کو کہنا ہے

ادھر آؤ مرے منہ میں تمہیں اپنی زباں رکھ دو

وفا کا راز اس مجمع میں کھولا جا نہیں سکتا

سوا محشر کے کوئی اور روز امتحاں رکھ دو

محبت اور تسلی اس پہ ہوش زندگی کیفیؔ

نہیں اٹھتا اگر کاندھے سے یہ نار گراں رکھ دو