تمہیں کہہ دو تمہارے در سے دیوانے کہاں جائیں

تمہیں کہہ دو تمہارے در سے دیوانے کہاں جائیں

یہاں جب شمع روشن ہے تو پروانے کہاں جائیں

خوشی سے بند کر دیں میکدے سرکار مالک ہیں

مگر یہ تو کہیں ہم دل کو بہلانے کہاں جائیں

بجا ارشاد فرمایا کہ مے نوشی نہیں اچھی

ذرا یہ بھی بتا دیں ہم سکوں پانے کہاں جائیں

ہمیں دیر و حرم سے کچھ عداوت تو نہیں ناصح

مگر ہر سمت راہوں میں ہیں بت خانے کہاں جائیں

جہاں سے مل گیا ہے سلسلہ راہ طریقت کا

کمالؔ اس آستاں سے اٹھ کے دیوانے کہاں جائیں