کیا سیاہی سے شب ہجراں کے ڈر جاتا ہے دل

کیا سیاہی سے شب ہجراں کے ڈر جاتا ہے دل

طفل بدخو کی طرح رہ رہ کے چلاتا ہے دل

ہم نے دیکھا ہے تماشا آمدِ سیلاب کا

کب کسی کے روکے سے رکتا ہے جب آتا ہے دل

وصل کی شب میں نہ تھا دلدار کو بھی اضطراب

میرے برمیں جیسے روز ہجر گھبراتا ہے دل

کس قدر شیریں شمائل ہے تو اے شاخِ نبات

دیکھتا ہوں جب تجھے سو سو مزے پاتا ہے دل

شعلہ کو لرزش نہیں ہوتی مکانِ بند میں

سینۂ عاشق میں کیوں ہر لحظہ تھراتا ہے دل

ایک دلبر کے ہوں مفتوں جس طرح دو وضعدار

دل سے شرماتا ہوں میں اور مجھ سے شرماتا ہے دل

بے قراری دل کی میں کیوں کر جتاؤں یار کو

سینہ پر جب ہاتھ رکھتا ہے ٹھہر جاتا ہے دل

غنچۂ پژمردہ پھر شاداب ہو ممکن نہیں

ہائے اپنا اب کوئی ساعت میں مرجھاتا ہے دل

دل گیسو ہے شہیدیؔ اس کی زلفِ حلقہ دار

جس نے دیکھا ایک نظر خوش ہو کے پھنسواتا ہے دل