کرے رنجور دل کو کیوں نہ چشم یار کا سایا

کرے رنجور دل کو کیوں نہ چشم یار کا سایا

وہ کیا اچھا رہے جس پر پڑے بیمار کا سایا

قصور فہم ہے سمجھے اسے گر خار کا سایا

پڑا لیلیٰ ترے مجنوں کے جسم زار کا سایا

دلا سرو چمن کیا ہے قد دلدار کا سایا

کہ سنبل بھی ہے اس کی زلف عنبر یار کا سایا

مزار کوہ کن پر شامیانے کی کیا حاجت

سدا رہتا ہے اس پر دامن کہسار کا سایا

کروں میں کیوں نہ اے دل سورۂ جن پڑھ کے دم تجھ پر

کہ تجھ کو ہو گیا ہے اس پری رخسار کا سایا

سیہ کاروں پہ ہے نازل ہمیشہ رحمت باری

بفرق مے کشاں ہے ابر دریا بار کا سایا

سمجھ کر سانپ اس کو وہ گلے سے میرے آ لپٹا

جو شب بستر پہ دیکھا گل بدن نے ہار کا سایا

ہوس خیمہ نشینی کی نہیں ہم خاکساروں کو

ترے اے چرخ بس ہے گنبد دوار کا سایا

نہ جانا سر زمین زلف سے تو مانگ میں اے دل

نہ اس رستے میں پانی ہے نہ ہے اشجار کا سایا

نصیرؔ خستہ جاں جنت سے اس کوچے کو کب بدلے

بہ از ظل ہما ہے یار کی دیوار کا سایا