سامنا دل نے کیا ہے اس نگاہ ناز کا

سامنا دل نے کیا ہے اس نگاہ ناز کا

دیکھیے انجام کیا ہوتا ہے اس آغاز کا

کشتہ کر کے آنکھ سے اب دیکھتے ہو کیا مجھے

کام جادو کا نہیں یاں کام ہے اعجاز کا

اس کے دم دینے پہ کیوں زندہ رہے فرقت میں ہم

حوصلہ تو خود بڑھایا ہم نے اس دم باز کا

پیشوائی کے لیے دوڑی لحد سے بیکسی

جب ہوا کھٹکا کسی کے پاؤں کے انداز کا

بعد مرنے کے ہوا معلوم مجھ کو اے کششؔ

میں بھی اک مخفی تھا گنجینہ کسی کے راز کا