دل کو داغوں سے شب ہجر بہلنے نہ دیا

دل کو داغوں سے شب ہجر بہلنے نہ دیا

مشعلوں کو شب تاریک میں جلنے نہ دیا

باغ عالم میں ہمیں پھولنے پھلنے نہ دیا

آسماں نے کوئی ارماں نکلنے نہ دیا

سوزش دل نے کبھی اشکوں کو ڈھلنے نہ دیا

ہم نے اس دھوپ میں بچوں کو نکلنے نہ دیا

معشوق پابوس میں عاشق نے بچھائی آنکھیں

فرش گل پر کبھی اس شوخ کو چلنے نہ دیا

نگہ ناز کے وہ تیر لگائے پیہم

بانکے ترچھوں کو ذرا اس نے سنبھلنے نہ دیا

محفل یار میں اغیار ہیں ہائے غضب

باغ فردوس سے کانٹوں کو نکلنے نہ دیا

خون عشاق سے قاتل نے نہ کھیلی ہولی

صف مقتل میں کبھی رنگ اچھلنے نہ دیا

وصل میں گیسوئے شب گوں نے چھپائی عارض

لیلۃ القدر میں کیوں چاند نکلنے نہ دیا

عمر بھر دل میں رہی یاد پری رویوں کی

کوثرؔ اس شیشے سے پریوں کو نکلنے نہ دیا