میاں سے نکلا جو تیغہ اس ستم ایجاد کا

میاں سے نکلا جو تیغہ اس ستم ایجاد کا

ہاتھ بھر کا ہو گیا دل عاشق ناشاد کا

خندۂ دنداں نما سے بجلیاں چمکایئے

پھونکنا مد نظر ہے گر دل ناشاد کا

المدد شوق شہادت دیکھیے ہوتا ہے کیا

دل ضعیف و ناتواں اور سامنا جلاد کا

جب نہ گردن کٹ سکی جھنجھلا کے چل دیا

تیغ کا منہ مڑتے ہی رخ پھر گیا جلاد کا

قیدیان دام گیسو کرتے ہیں شب بھر دعا

سلسلہ بڑھ جائے یارب قید کی صیاد کا

سرمگیں آنکھوں پر اس کے خال کا نقطہ نہیں

عین پر استاد نے کھینچا ہے حلقہ صاد کا

اہل عالم کہتے ہیں جس کو شہنشاہ سخن

میں بھی ہوں شاگرد کوثرؔ اس جگت استاد کا