ہے منور رخ پر نور سے سب گھر‌ باہر

ہے منور رخ پر نور سے سب گھر‌ باہر

ایک سا جلوہ خورشید ہے اندر باہر

بزم خلوت میں اگر چھپ کے حیا آنے لگی

بڑھ کے آواز دی شوخی نے کہ باہر باہر

سوزش دل کو بجھاتی نہیں چشم گریاں

گھر پھنکا جاتا ہے بہتا ہے سمندر باہر

ہیں سر راہ بچھائے ہوئے آنکھیں مشتاق

بولے وہ ظلم ہے نکلے کوئی کیوں کر باہر

جیتے جی نقش قدم بن کے جو بیٹھے نہ اٹھے

کوچۂ یار سے ہم نکلے ہیں مر کر باہر

جذبۂ شوق شہادت جو دکھائی بسمل

تیغ کاٹھی سے نکل آئی تڑپ کر باہر

بزم خلوت میں وہ سوتے ہیں دوپٹہ تانے

جلوۂ حسن خدا داد ہے اندر باہر

پردۂ ابر سے نکلا ہے مہ نو کوثرؔ

یا ہوا ہے میاں سے اس ترک کا خنجر باہر