ہوئی دل میں میرے جاناں تری کس قدر رسائی

ہوئی دل میں میرے جاناں تری کس قدر رسائی

مری شکل سے ہے ظاہر بخدا تری خدائی

مرے دل ربا کی صورت جو کہیں تو دیکھے زاہد

وہیں بھول جائے حقا تجھے ساری پارسائی

بخدا تم ہی تم ہی ہو جو نظر میں آ رہا ہے

کہیں شان کبریائی کہیں صورت گدائی

کہیں شکل عاشقانہ بخیال ماہ روئی

کہیں شان خود نمائی کہیں ناز و دلربائی

مجھے عشق نے دکھایا وہ مقام جس جگہ پر

نہ فلک کا ہے گزر واں نہ ملک کی ہے رسائی

جو کروں طواف اپنا تو بجا ہے اور زیبا

تری شکل پیاری پیاری مرے دل میں ہے سمائی

ذرا اب خلیلؔ دیکھو بجمال شاہ خادم

ہمہ طرز بے نیازی ہمہ شان مصطفائیؐ