روداد مری بیتابی کی ان کو تو سنائی لوگوں نے

روداد مری بیتابی کی ان کو تو سنائی لوگوں نے

بے چین ہیں وہ بھی میرے لیے، یہ بات چھپائی لوگوں نے

مجھ سے ہی وفا کا درس لیا میرا ہی نشیمن پھونک دیا

الزام تو آیا بجلی پر اور آگ لگائی لوگوں نے

میری ہی بدولت بزم سجی، مجھ کو ہی کوئی ساغر نہ ملا

چھلکی تھی گلابی میرے لیے اور پیاس بجھائی لوگوں نے

جب خاکِ نشیمن بھی نہ رہی، تب ٹوٹ کے برسا بادل بھی

اس وقت کہاں تھی کالی گھٹا؟ جب آگ لگائی لوگوں نے

لوگوں کی یہ فطرت کیا کہیے اب مجھ کو شرابی کہتے ہیں

حالاں کہ مجھے میخانے کی خود راہ دکھائی لوگوں نے