خود کو مٹانا گم ہو جانا ناموری سے مشکل ہے

خود کو مٹانا گم ہو جانا ناموری سے مشکل ہے

درویشی آسان نہیں ہے تاجوری سے مشکل ہے

جان و دل و دین و دھرم کیا نام خدا کیا نام رسول

کسی پہ سب کچھ قرباں کرنا دریا دلی سے مشکل ہے

کفر ظاہر کفر باطن کفر قلب و کفر حق

دین و ایماں زہد و عبادت نیم شبی سے مشکل ہے

بت کی پرستش کرتا ہوں میں بت کی پرستش اے زاہد

بت کی پرستش ذکر خدا کی درد سری سے مشکل ہے

وہ بھی چپ ہیں ہم بھی چپ ہیں دل کا تخاطب دل سے ہے

دل کی باتوں کو پا لینا جادوگری سے مشکل ہے

جسم کا ریشہ ریشہ مچلے درد محبت فاش کرے

عشق میں کاوشؔ خاموشی تو سخنوری سے مشکل ہے