کرم کے بھروسے جو مے خواریاں ہیں

کرم کے بھروسے جو مے خواریاں ہیں

وہ مے خواریاں کیا نکو کاریاں ہیں

نہ لو نام الفت جو خودداریاں ہیں

بہت ذلتیں ہیں بڑی خواریاں ہیں

جو آسان سمجھو تو ہے عشق آساں

جو دشوار کر لو تو دشواریاں ہیں

کسی کو کسی سے کسی کو کسی سے

ہمیں اپنی ہستی سے بیزاریاں ہیں

ہمیں جب نہ پھیلائیں دامن ملے کیا

ادھر سے تو ہر دم گہر باریاں ہیں

نہ گھبرا کوئی دل میں گھر کر رہا ہے

مبارک کسی کی دل آزاریاں ہیں

نکما ہوا میں تو مجذوبؔ کیا غم

بڑی کار آمد یہ بے کاریاں ہیں