یہ کیا ہے ترے ہوتے افسردہ ہے مے خانہ

یہ کیا ہے ترے ہوتے افسردہ ہے مے خانہ

ہاں اے دل دیوانہ اک نعرۂ مستانہ

کہتا ہوا پھرتا ہے محشر میں یہ دیوانہ

یا رب مرا ویرانہ یا رب مرا ویرانہ

ہے آمد و رفت اپنی اس بزم میں روزانہ

اک در در توبہ ہے اک در در مے خانہ

اتنی تو پلا ساقی اب اس سے بھی کیا کم ہو

لبریز تو ہو جائے یہ عمر کا پیمانہ

ساقی نے بدل ڈالی دنیا مری ہستی کی

آنکھیں ہیں کہ میخانے دل ہے کہ پری خانہ

دے تاؤ نہ اب اتنا کر آنچ ذرا ہلکی

تیزی پہ ہے مے ساقی اڑ جائے نہ مے خانہ

مجذوبؔ کو جب دیکھا محفل کی طرف آتے

گھبرا کے پکار اٹھے دیوانہ ہے دیوانہ