عبث کہتا ہے چارہ گر یہاں تک تھا یہاں تک ہے

عبث کہتا ہے چارہ گر یہاں تک تھا یہاں تک ہے

وہ کیا جانے کہ زخم دل کہاں تک تھا کہاں تک ہے

نہ دھوکہ دے مجھے ہمدم وہ آیا ہے نہ آئے گا

پیام وعدۂ وصلت زباں تک تھا زباں تک ہے

کٹی روتے ہی اب تک عمر آگے دیکھیے کیا ہو

بتاؤں کیا کہ دل میں غم کہاں تھا کہاں تک ہے

وہاں تک قیس کب پہنچا وہاں فرہاد کب آیا

بیابان گزر اپنا جہاں تک تھا جہاں تک ہے

مجھے تو عمر بھر رونا ہے یارو کوئی موسم ہو

یہ مت سمجھو مرا نالہ خزاں تک تھا خزاں تک ہے

مرے ہی دل تک آنا تھا مرے ہی دل تک آنا ہے

خدنگ ناز کا پلہ یہاں تک تھا یہاں تک ہے

تکلف یہ تری خاموشیاں تجھ کو مٹا دیں گی

زمانے میں ترا چرچا فغاں تک تھا فغاں تک ہے